Caino e Abele

...fonti MOOLTO apocrife dal deserto di Giudea...
(ritrovamento del 28/01/2008)

Caino e Abele

A forsa d’andar sempar in gir nud adme di bech, Adamo ed Eva i’eva fat du fioi: Caino e Abele. Abele l’era bel adme’l sol e sempar soridente, Caino l’era brut adme la fam e sempar rabì adme n’asan. Quand le robe le ‘ndava ben, l’era bravo Abele; quand le ‘ndava mal, l’era an pandol Caino. Quand a gh’era da taiàr al prà i ciamava Abele; quand’a gh’era da sturàr la turca, tucava sempar a Caino.
E sìcome a la lunga al pan al fà la mùfa e la mama la sa stùfa, an bel giuran Caino al cupa su fradel a sgiaronade.

Quand al Padreterno as n’intàia al ciama Caino: “Caino! Indu’èl to fradèl?”
“Cùsa vot ca sàpia mì? Gùntia da tegnar ‘drè a le cavre o a me fradèl?!”
“To fradel l’è mort! E ‘t ze stà tì a cupàral, delinquente!”- agh dis Dio
“Cuma fet a dir ca sun stà mì sa t’è gnancùr catà al cadavere, l’arma dal delito e tantomeno al movente!”
“Ascùltam chi Montalbano – agh dis al Signor – a sì al mund in quatar: to padar e to madar iè sempar in camporèla, to fradel l’è mort … tì chi dìsat ca sia stà?!!”
“Mì no’d sicùr, parchè g’ho n’alibi ad fèr!”- al dis cal brut cefo ad Caino -“S’eri ‘dre stùrar la turca, cume sempar! Toh, nasa, a g’ho ancùra le man ca spùsa!!”
“At credarè mia da fam pasàr par stupid, brut busiàdar! – agh dis al Padreterno – Anca sa g’ho mia la parabula mì vedi tut e sentì tut … e t’ho vist cupar to fradel, cal t’eva fat gnìnte, pòvra stela!”
“Cata su le to robe e va via, che s’at vedi ancora in gir at daghi foch cun la diavulina”- a sbraia ‘dre al Signur a Caino; e pu perples tra sé e sé ‘l cumenta:
“Diu ta stramaledisa mund! Ho gnanca fat in temp a creari chi cumincia bela a cuparas tra d’lor!”

L'è parola dal signur.