La storia 'd Giosué ...

...fonti MOOLTO apocrife dal deserto di Giudea...
(Ritrovamento del 27/07/2014)

Il Quinto Evangelista - Il Vangelo secondo il Lanfro

La storia 'd Giosuè

Par solit l'era al Padreterno a ciamar Mose', ma an bel giuran a suced l'arves: "Ascultam chi Dio! - al dis Mose' - a l'è sinquantani ch'a giri adme'n semo par tut al Medioriente, che traparentesi l'e' an pustas, a la ricerca adla tera prumesa e ta m'e' fat catàr gnanca an campegio indu piantar l'iglu!"

Alura Dio agh fa vedar le tere ad Canaan egh dis: "Eco la tera prumesa! Ma 'tla daghi mia a ti', parche' e' riva' la to ora! Agh la daghi a to neù Giosue'"

"Vaca diaol, che delicatesa!" - al dis Mose' prima da tirar i gambin.

Dopo an per d'ore al Padreterno al manda a ciamar Giosue' egh fa: "Giosue'! Guida al me popolo ala conquista adla tera prumesa!"

"E Mose' indu e'l'!?" - agh fa claltar

"L'e' pena anda' via con Mafioli!" - agh dis Dio laconic - "adès a tuca tì menàr a spas i'ebrei! Ma preòcupat mia parche' la Tera prumesa l'e' davsina!"

"Cumèla ch'a senti spusa ad ciavada!?" - al dis Giosue' inorci'

"Ma va la', pistapoce! - al dis Jahvè - Eco la tèra ch’a v'ho prumes!"

"Indu èla!?"

"Cla la'! La tèra ad Canaan!"

"E i Canaanei indu ia metema!?"

"I sa stricara' an po'! A dormare' co-e-pé! A na qual manera a farema!"

"Ma par Dio! E mi cos'agh dighi a la me gent, ch'ema gira' quatarsent ani in dal desert par dormar co-e-pe' coi canaanei!?"

"Alura fa na bela guera contra i Canaanei e conquista Gerico!"

"Na paia! - al dis Giosue' realistic - "i'e' al dupi da nualtar e ie' tuti gros cume armari e catìv adme la mort. A va a fnir ch'a ia ciapéma!"

"Ma va la'! Disfatìsta! Ho elabura' na strategia vincente!"

"Sentema!"

"At parti con tuti i solda'! At fe' sét gir inturan ai mur da Gerico e po at pici i pe par tera cumpagn di All Blacks!"

"Vaca Diaol che tatica! Indu' l'et elaburada, a l'ultim padigliun dal Vinitaly!?" - al ribat Giosue' polemic.

"Vedat ch'at capisi an gril! Girando inturan a Gerico a'ia imbriaghema e piciando i pe a fema crodar i mur. As ciama Gerico parche' i mur i'e' ad gera, se i mur i fudes da prede las ciamaria Predazzo!"

"Chesta indu l'et lèta, insl’Argan?!"

Fato-sta-ed-è che a la fin i fa la paiasada inturan a le mura cum’ea dit al Padreterno. la cità la croda da bon e i Canaanei i s’arend sensa cundisiun.

"Tta fat, ma che guera dal caso! Sperema ch'i la scriva mia in si lìbar da storia! -al dis Giosue', che ades al gh’eva da rifar la cità da szero- E ades cusa fema con tutla cla gera? A par da esar in sal Conero!"

“Dropala par i vialet!”.

L'è parola dal signur