Sodoma e Gomorra

...fonti MOOLTO apocrife dal deserto di Giudea...
(Ritrovamento del 28/09/2010)

l Sodoma e Gomora

Abramo l’era sempar in ufìsi dal Padreterno a ciuciàgh al gòs.

An giuran al pìcia a la porta, al va dentar e’gh fa: “Signur, a Sodoma e Gomora i’s fa di gran canùn e i varda i film porno!”

“Bruti spurcaciun! Adès a vaghi subit a vedar e s’at gh’è ragiun a daghi foch a tuti col lanciafiame!” –  al dis rabiùs al Padreterno intant cl’infila la porta par corar fora, cun Abramo sempar dadrè-dal-cul.

“Indùa andema prima?!” – admanda Abramo

“Andema prima a Gomora, ch’a vurés mia che a Sodoma …!”

In-lunga a la strada Abramo l’incalsa al Signur: “E cume la metema s’a catema na cità da spurcaciun cun sinquanta brave persune!? Dèt foçh anca a quele!?”

“Par forsa! A g’ho mia le armi inteligenti d’iamericàn! A g’ho an lanciafiame cun la punta dal dùdas, quel c’ho drovà par impisàr al sul!”

“Ma’ vot che al Brico i gh’abia mia an lancaifiame pusè piculìn?!” – al dis Abramo, che da l’ultima volta ch’l’era stà lì-lì par brustulir su fiòl, cul foch al gh’ev mia pu tanta afesiùn.

“Ma vat a far ciavàr tì e’l Brico! G’ho mia temp da pérdar in gir par negosì! – al ribat Dio stisì – Putòst metéma na franchigia!”

“E cusa sarésla?”

“Diséma che s’agh fudés sinquanta unèst e tuti chi’altar laszarun a dema foch a nisun! Vala ben adzìta?!”

“E s’agh an fudés sol quaranta d’unèst? Cusa fèt, a’ia brùsat?!”

“Alura diséma che s’an catéma anca sul trenta, an bruséma gnan’uno! Vala ben adzìta?! Rompibale!!?”

“E s’agh an fudés apena vint?!”

“Ascultam chi, sbregaversze! A sema gnì fin chi par ripasàr le tabelìne dal diés, u par far giustìsia?!” – a truna al Signur – “ a sun in gir da stamatina, cun an lanciafiame da trèdas quintai e na bumbula ‘d gas da vintisinch litar, ades bisugnarà ben ch’a brusa qualdun!!”

Abramo l’era indecis se lasar perdar u insistar ancura, anca parchè al Padreterno l’era incasà negar, abastansa agità e cun an lanciafiame in man…! Par al fato ch’al magnava tanta fruta e verdura e l’eva mai sgobà, Abramo l’era rivà a sent-e-vintiset ani. Agh sares mia dispiasì tirar avanti altar trent’ani e alura al decid da seguitar a caminar e cuminciar a tàsar.

La matina dopo, quand i riva a Gomora agh cur incuntra al nono da Saviano, ch’agh cunta tut quel ch’è sucès in cità in di ultim trent’ani, alura al Padreterno al taca al lanciafiame el dis: “Spostat nono, ch’a vurìa mia strinat i pei dal nas!”

In quatr-e-quatr-ot a’l voda la bumbula. E Ambramo in part ch’al varda mut e schis.

A la basùra i part e i s’invia vers Sodoma. Quand i riva agh cur incuntra n’umin da sinquant’ani ch’as ciamava Lot, perché quand al stava a l’ardent-sul sensa capèl al cominciava a dar i nùmar. Lot l’era an gran sgobador e na gran brava persuna, cumpagn da su muier. Dio as varda inturan e’l ved in mèsa a la strada na mucia ad gent vestida cume la Barby.

“Lot! Ma cusa fàla tuta cla gent in gir? Ma gh’è nisùn ch’a lavura a Sodoma?!” – admanda al Signur

“No! Ogi gh’è tut serà, parchè gh’è al GayPride!” – al dis Lot

E intant ch’i dis adzita agh vegn d’arent n’umun d’an metr-e-nuanta, cui bras da Primo Carnera, le sanfe adla Monica Belùci e i cavèi adla Pampanini ch’al fa: “Lot! Ma parchè làsat mia vegnar i tu amich cun nualtar a szugar a butiglia?!”

“Mi l’è mei ch’a szoga mia parchè ma spusa al fià!” – al dis Abramo disgustà

“Lot! Ma perché gniv mia cun nualtar a far al bagno in piscina?!”

“Mi a posi mia far al bagno parchè ho ‘pena magnà ‘na rustichèla!” - al dis Abramo

“Lot! Ma parchè …!?”

“Ascùltam chi Platinet! – a sbòta al Padreterno – ma parchè a vèt mia a sercàt al murùs al Bus-dal-Gat!? Va a far al paiàs in mèsa a la to carnevalada e làsa lì da rumpar le bale!!  … ma pensac-tì chi-lù de … al vol sugar a butiglia col Padreterno!! … ma ‘t’la dagh mi la butiglia! Insla ghigna!! – a dis al Signur caminando rabiùs avanti e indrè - … ma ch’at vegna n’acident … al vuleva purtàm a fa’l bagno!! … ma’t’al fagh far mi al bagno! Indla turca!!”

Abramo l’avria vulì dir quèl par metal chiet, ma Dio l’era talmente alterà ch’l’era mei tàsar.

Al seguitava a andar avanti e indrè e a tirar saràche. Roba da far vegnar al sistema nervus. Finchè, a’n certo punto, as gira ‘dla part adla cità e’l fa cascar pùlvar, gerlìna e foçh infin’a quaciàr tut e tuti. A la fin a par da èsar a Ercolano. In’dla prèsia al cuca anca la muier da Lot, ch’la fa la fin dal sùrac cume tuti chi’altar.

“Scusa Lot s’a t’ho secà la muier, ma seri trop rabì!” – agh fa al Padreterno murtificà

“Ma no Signur, figùrat! – al dis Lot cui lagrimun – l’era gnanca buna da far da magnar! L’è ch’a ta m’è lasà gnanca an cristian par szugar a briscula …!”

“S’at vo andar a Gomora – agh sugeris Dio - la a gh’è al nono da Saviano ch’al g’ha al stes problema!”

L'è parola dal signur