La parabula dal servidur cancar

...fonti MOOLTO apocrife dal deserto di Giudea...
(Ritrovamento del 15/09/2012)

La Parabula dal Servidur cancar

Pietro e Giuda i'era ‘dre szugàr a spluket in dal giardin dal Getzemani. Pietro l'era bela vèrt in gambe e cal càncar da Giuda agh tira na legnada in sal mignulìn.
"Ahia! La vaca at t'ha fat!"
"Scusa! Ho mia fat apòsta!"-as giustifica Giuda, fals adme Giuda-"sara' sta' al vent!"
"Ma tol in dal cul ti e'l vent! Apena tam rivi a tir at pianti an brostol in ghigna!" - al baiòca Pietro cui lagrimùn a'i oçh
"Perdùna Pietro!" - al dis Gesu'Crist seràfic.
"Perdùna an per da bale! Al m'ha schisa' al didìn!"
"Perdùna sèt volte!"- al rincara la dose Gesu'- "Ansi, perdùna sèt volte sèt!"
"Ah, i'e' tuti bravi a far i culaton col cul da ch'iàltar! E po' dim na roba Eulero Ven:
Sèt par sèt a fa quarantanof, s'at tiri via al me mignulìn che urmai l'e' anda', a mi' di di' a man resta nof, ch'iàltar quaranta agh' ia métat tì?!"
Alura al Signur cun na pasiensa da orsolina al tos Pietro ad na banda e'gh cunta la fola dal servidur cancar.
An giuran al Re al manda a ciamàr an servidur ch'al g'ha da dàgh indre' di bèsi e'gh fa: "Mi da ti 'vànsi di bèsi! Dam'i indrè subit sino' a vendi tu muier e ta sgrii la machina!"
"S'at se' bun da vendar me muier, la machina at la regali e'gh faghi anca al pieno!"- al dis al servidur
"Alùra fema na roba: at faghi an credit defolt swop!"
"E cusa saresal?!- admanda al servidur perples
"Che sa tam'ia porti mia la smana qu’egn cui interes at dàghi foch!"
Beh, al servidur al fa mia intemp a andar fora dal castèl ch’al càta an su debitur.
Sensa dir gnàn ciao agh fa:"Dam indre' i me bèsi, con la szunta dal sprèd e'dl'Euribor!"
"'Gh'i ho mia!"
"Gnanca l'Euribor!?"
"Mache'! Gnanca quel!"
Alura lu, par tuta risposta, agh fa far al decreto ingiuntivo e'gh magna fora la ca’ e'l garàg.
Quand al Re al vegn a saver adla bastardada cl'ha fat al su servidur al la manda a ciamàr, agh voda ados na damigiana da Shell W Pauer e'l l'impìsa cume Giuana d'Arco :"
"Pietro, et capi' la morale adla favola?!"
"Si! Che sa fagh mia la pace cun cal cancar adl'Iscariota a tam fe' far la fin dal surack!"
"Eco brào! Alura va a fat dar an basìn da Giuda, che adzita al fa an po' d'alenamènt!"
 
L'è parola dal signur