I Re Magi

...fonti MOOLTO apocrife dal deserto di Giudea...
(ritrovamento del 03/01/2008)

Dopo dò smane cl’era nat al BambinGesù, Giusepe an na pudeva bèla pu. Al putìn al sigàva tuta not, al bo e l’asinèl i spùsava da far schif e seguitava a rivàr pastur a lasàr szo cavre e agnèi.
In ‘dla capana a gh’era an pulèr ch’a faseva paura e la Madona e Giusepe i’savea pu indù giràras. Visto ch’a gh’era mia ‘bastansa burdèl, al giùran adl’Epifania a riva tri umùn, vestì cume di paiàs, insima a tri camèi.

“Oh Madar Santa! A mancava ‘pena i camèi!”- al dis Giusepe sentà inmès’a le pegure.
“Sema tri sapienti e rivema dal luntan Oriente. Ema tegnì ‘dre a la stèla cumeta par diversi mes, e la stèla la s’ha menà fin chì!”

“Agh vol na bèla sapiensa par tegnar adrè a na stèla par di mes!” – al dis Giusepe perplès – “E gh’a scumeti che par vedar la stela anca da giuran a v’è tucà far diverse sbiceràde da Jeghermaister!!”

“Sema gnì fin chi parchè gh’ema tri regalìn par al BambinGesù” – al dis uno di Magi
“At vore mia mulàram szo anca i camèi! I ma schìsa tute le pegure!”
“Ma va la! - al seguita al Magio in snuciùn davanti a la Madona – “éma purtà òr incenso e mira!”
“L’òr tal po lasàr szo, ma l’incenso al spùsa e la mira so gnàn’cusl’è!”
“Giusepe mia far al malducà! – la dis la Madona ringrasiando - I’è di regài, pudéma mia dàghi indrè!”
“L’è tuta roba ch’a riva adla Cina, l’è tòsica e piena da coloranti, la va mia ben par i putìn!” – l’insist Giusepe
“E po’ ma spiegat cum’èla che infin a la vigilia ad Nadal as cagava nisùn e gh’era gnanca na camara par farat parturir e adès i’è ‘dventà tuti bon e riva regài da tuti i cantùn?!”
“Caro ‘l me Gepe, l’è mèi ca tat bìtui!” – la dis la Madona cun sarcasmo – “Parchè sarà sempar adzita! Da Nadal a l’Epifania i’d venta tuti cesaroi e caritatevoli. Dal set ad genaio i turna a èsar di cancar pègio che prima e in cesa at i’a vedi pù!”
“Al gh’eva pran ragiun me nòno: tuti i salmi i fnis in Gloria e tute le feste in baldoria!”