La multiplicasiun di pan e di pes

...fonti MOOLTO apocrife dal deserto di Giudea...
(Ritrovamento del 07/10/2010)

Il Quinto Evangelista - Il Vangelo secondo il Lanfro

La multiplicasiun di pan e di pes

A forsa d’indrisar oçh ai sguers e resusitar vecine Gesù l’era ‘dventà famus e gh’era sempar pusè gent ch’andava da lù par faras giustar le gambe ramade o par faras segnar al foch da Sant’Antoni .

An giuran al Signur l’era rampà in’s’na culina parchè in pianura gh’era stofa e tirava gnanca an fil d’aria e tuti ch’i’altar via-anca-lur-in sla culina adrè a Gesù. A la fin adla guciada agh sarà stà sincsent persune in’sla culina.

Cul sul ch’a piciava in custera e’l rifles adle prede, a gh’era an calur ch’a pareva da morar, ma Gesù Crist imperterito l’ea cumincià a dir mesa. A l’ofertorio nisun eva ofert gninte parchè i’era tuti in buleta, a ‘l segno ‘dla pace nisun eva dat la man a nisun parchè iera tuti rabi ‘dme d’i asan, a la benedisiun nisun era andà a cà in pace parchè i gh’eva tuti la pansa voda e le gambe fiape.

Alura Pietro al va darent a Gesù, cl’è ancura ‘dre pregar e’gh fa: “Maestar, la gent la g’ha fam!”

“Hai mia tolt su di crecker?!” – a dis al Signur

“A credi mia ch’i gh’abia ‘drè di cracker! E nualtar a gh’ema gnit da daragh!” – agh rispund Pietro

“Ma cume!? Gh’eom mia dal pan e dal pes indla borsa frigo!?”

“Certo ch’a gl’ema! Ma agh sarà dò ciopine ad pan e tre platesse! Cosa agh dema, na lisca e na brisa pr’un?!”

“Tulì ‘dle siste, metìg dentar ch’al poch ch’a gh’ema e cumincièma l’happy-hauar!” – al dis Gesù-Crist a Pietro, ch’al pareva mia tant cunvint.

I disepui i cumincia a dar via al pes e’l pan cume i vuluntari adla festa ‘d l’Unità e le siste le traburda ad pes e ciupìne ‘d pan! E cum i’è bune! Tuti i magna da gust e in abundansa.

“Maestar! Agh vurìa an po’ ad bianch, parchè am sun impumà!” – al dis Pietro cun la buca piena – “e la gent la magnà in prèsia e la sa strangòsa!”

Alura Gesù agh picia n’altar miracul di sui e’l procura anca suquante damigiane ad vin bianch bel fresch.

“Maestar – a salta su Giacomo , cl’era an sluà mia da schèrs – la buca l’è mia straca finch’la sa mia da vaca!”

Alura Gesù al trasforma le buase in furmain verd.

“Maestar – al dis Giuda dopù ch’ì ha magnà e bevì su tut – fema al cin-cin col Limoncino?”

“Ades andè da via al cul!”

Parchè al Signur l’è bun, ma l’om da sempar as n’aprofita.

L'è parola dal signur