L'Infansia ad Gesù

 ...fonti MOOLTO apocrife dal deserto di Giudea...
(ritrovamento del 12/04/2008)

L'infansia ad Gesù

Quand’l’era putlet Gesù al lavorava a bùtega da su pàdar, ch’al faszeva al marangùn a Naszareth.
Tuti i giùran a gh’era da cridàr, parchè Gesù al g’ha mai avì tanta voia da lavuràr e’l pòar Giusepe as magnava al figà. 
An giùran a riva an centurione cun n’urdinasiun da quatar crus ad legn, par giustisiàr di delinquenti, alura Giusepe al va da su fiol e’gh fa:
“Nano, va ca gh’ema n’urdan da quatar crus ad legn! Agh la càvat a farle par admatina?”
E Gesù: “No varda Papà! Fale ti! Mi cun le crus a g’ho mia tanta afesiùn!”
Al giùran dopo a riva a bùtega an servitur dal governatore, cl’eva decis da rifar tuti i paviment. Alura Giusepe al ciama Gesù e’gh fa:
“Nano, va ch’agh sarìa d’andar a cà dal governatur Pilato par rifàr i battiscopa!”

E Gesù: ”No varda Papà! Vagh tì! Parchè a mì Pilato al ma stà in sle bale!”
Dopo an per d’ore a ’riva Ermes Iscariota, al padar da Giuda, ch’al vuleva quaciàr na sparsàia cun n’armari a mur fat su misura.
Alura Giusepe al va ancura da Gesù e’gh fa: “Nano, va a ca’ dal tu amich Giuda a tor le misure ‘dla sparsàia”.
E Gesù: “No Papà! Am dispiàs, ma mi a ca’ da cal busiàdar agh’ vaghi mia!”
“Ascultam chi vòia-ad-laurar-saltam-adòs!" – agh dis Giusepe esasperà – “ho capì che da grand at vo far al pret, ma intant c’at vegni prunt gh’èt idea da dàram na man o pensat da fàrat mantegnar infin a trent’ani sensa piantar gnanca an ciò?!”
“Am pias mia piantar i ciò, parchè vurìa mia sbusaram na man prima dal temp!!”
“Gnaca a mi am pias mia gratàr le gambe di tavui cun la carta vedrada, ficàr i sproch in dle rode di caret e disvidàr cui dì i bulùn invidà cun la brugola … ma s’a voi che a sena agh sia quel in dal piàt m’al faghi piàsar listess!”
“Mia sul ad pan al viv l’om, ma anca da tute le parole ch’a dis al Signur!”
“Ah Si??! Alura fema na bela roba, stasera a sena ti at magni na pignata ad parole e mi e to madar a magnema an piatìn da fuiàde cui nèdar!”
“Ricordat papà – agh dis Gesù, che a volte al pareva al pàdar da so pàdar – che a sgobàr e a mòrar a sema sempar in temp!”
E’l gh’eva pran ragiun, parchè l’è mèi ciapàr dal lasaron che andàr a cà stràc!
 
L'è parola dal signur