Gesù insegna a pregare

...fonti MOOLTO apocrife dal deserto di Giudea...
(ritrovamento del 23/03/2009)

Gesu' insegna a pregare

In sla strada par Cafarnao, gh’era na bèla banchina a l’ùmbra.
“Sentemas szo ch’a tirema fià!” – al dis al Signur ai disèpui - “Pietro! Dai ch’a preghema tuti insiem, cumìncia tì!”

Pietro al sa stravaca insìma a na preda, cume la sirenetta da Andersen e’l taca a pregar cun na cantilena da far vegnar al lat ai calcagn:
“San Giuani in Persiceto fam bucàr adme’n criceto!”

“Lasa lì da far al paiàs!” - agh dis Gesù - “e metat cumpòst!”

Alura Pietro al s’indrìsa, as met in snuciùn e’l cuntinua:
“Sacro Cuore di Maria fa ch’a vinsa a la luteria!”

“S’at szè stupid!” - agh dis al Signur.

E Pietro impasibile al sèguita: 
“Ti prego Santa Caterina, sbàsa al prèsi adla benszìna!”
“Sant’Egidio e San Giuani fèm scampar fin’a sent’ani!”
“Sant’Antoni ad Bocabusa fa ch’a cata la murusa!”
“Santa Rita adla Stradela fa ch’a la cata biunda e bèla!”
“San Teodoro di ciprèsi fa ch’la gh’abia anca di bèsi!”

“Ma èla la manera da parlar al padreterno?! - al salta su Gesù Crist esasperà - “ma set bun da parlar anca da quel d’altar o gh’èt in testa sol done, bèsi e balon?”

“Ascultam chi prufesùr, visto ch’at se brào sol tì, dim ti cuma a gh’ontia da pregar!”

“Alura, adès ta spieghi - agh dis Gesù Crist - gira le man a cul-in-su cùme par sentar sa piòf e ‘po ripeti:

Padar Nostar ch’at se in ciel,
fa che tuti i’t voia ben,
fa ch’a fema tuti bèl,
ch’a sapiema bun da perdunar
e ch’agh sia sempar da magnar
sta mia mandar adle tentasiun
e libera tuti dal mal
Amen”

“Tut chi?!” - al dis Pietro delùs
“Bisogna ch’a t’la scurti bèlo! A sema al mund in sié miliàrd, se ‘l Padreterno al g’ha da tegnar adre ai stròlich da tuti l’è pu fnìda!”
“E sa g’ho ad bisogn da robe pratiche e concrete cum’a faghi?!”
“Scrivi na letera a Santa Lucia!”

L'è parola dal signur