I disepui da Emmaus

...fonti MOOLTO apocrife dal deserto di Giudea... 
(ritrovamento del 01/07/2009)

Il Quinto Evangelista - Il Vangelo secondo il Lanfro

Gesù Risurt al fa n'impruvisada ai so putlet

Dopu na smana che Gesù l’era mort e risurt, i disepui i sera catà in na ca’ da Emmaus par far an spasin. L’eva pena fnì na man e Pietro l’era ‘dre cuntar i punt:

“Do ‘dle carte, do ‘dle spade ch’a val quatar, tre picule ch’a fa set, du unur ch’a fa nof, napula tersa ch’a fa dudas …!”

Intant ch’al cunta as dispalanca la porta e vegn dentar n’om, in pe par tera, cui cavei lungh e na tunica bianca.

“OOOhhh! La porta!!!!” – al gh’a sbraia adrè Pietro – “ a gh’èt i negar a ca tua??!!!”

“Quand mai t’ho mia lasà al num da Simun, visto ch’al fa rima cun sandrun!” - al dis l’om in pe par tera. Al vegn avanti pian pianin e l’inunda la camara da luce cume na lampada alogena. Tuti i disepui i resta mut e sensa fià, finchè Pietro as riciapa e’gh cur incuntra tut cuntent.

Al la brasa su e al la spalpugna fort, parchè al cred mia ai su oçh.

“Oh, schisa poch simiun, ch’a son tut an tai!” – al dis al Signur

Anca ch’ialtar is fa coragio e i riva darent a Gesù par farag le feste; tuti trane Tomaso, ch’al cred sol s’agh pucia al nas.

“Am vegnat a salutar anca ti o gh’ema d’aspetar i RIS da Parma!?” - al dis Gesù al su amich malfident.

“Gh’è mia bisogn di RIS, basta ca t’am feghi tucar le gruste!” - agh ribat Tomaso.

“Ti tuca pura e cunvinsat – agh dis al Signor ch’an na pol pù – ma dopo av dighi a tuti na roba: a v’ho dat la Bibia, al Levitico e’l Deuteronomio. A v’ho dat al Nuovo Testamento parchè quel veç l’era veç.

A sun gni al mund in Palestina anca s’as magna mal, am sun fat tradir e metar in crus al ters giuran a sun resusità e ades am vagh a sentar a la destra ad me padar e av vardi.

Sicume i’om i’è dur, pegar e malfident adme Tomaso a farema le ciese cul riscaldament par l’inveran e’l climatisadur par l’istà, farema i’oratori cui bigliardin e i tavulin da ping pong. Tute le domeniche a farema na mesa a la matina prest par le vecine, una a le dies par i giuan cun la chitara, una a le undas par quei ch’è andà a lèt tardi e una a la sera par quei chi va a far an girin in piasa.

Farema i pret vestì da negar, i cardinai vesti da rus e’l Papa vestì da bianc e quand an mor uno an fema n’altar.

Metarema an campanil darent a ogni cesa, al fema bèl alt e agh metema insima na campana ch’a fa burdel.

Mi fra’n qual an a vegni a giudicar i vif e i mort … e che nisun a diga “ma mi’l savevi mia!”, “ma mi pudevi mia!”, “ma a mi a m’eva dit grinte nisun!”.

Quel ch’am racumandi!!