Il cieco Bartimeo

...fonti MOOLTO apocrife dal deserto di Giudea...
(Ritrovamento del 01/09/2014)

Il Cieco Bartimeo

Invece da 'rivar a Gerusaleme Gesu' e i so putlet i'era fni' a Gerico parche' sa gh'era incioda' al TomTom.

"Ma cla vaca'to madar! Ma pusibul ch'agh sia gnanca an cartel!" - al dis Pietro cl'era quel ch'a tegneva la cartina.

A forsa da girar a la coia la gent la sera acorta ch'a gh'era Gesu'd Naszareth in cita' e i cureva tuti par faras far l'autografo.

In san cantun a gh'era senta' an sguers.

As ciamava Bartimeo e l'era fiol d'an certo Timeo... Cume se ogi agh fudes uno ch'as ciama Piersilvio e'l fudes al fiol d'an certo Silvio. Fagh par modo 'd dir!

Quand al sent numinar Gesu' as tira in pe' e agh cur incuntra, ma al s'intruca con Pietro ch'l'e' ancura 'dare balar al tango cun la cartina in man.

"Oh falso invalido! - al sbraia Pietro intant cal brigula long tirent - varda indu't ve'!"

Ma ch'l'altar al seguita a curar adre' al Signur cume n'ava mata: "Gesu', Gesu' fat tucar ch'a recupera almen na qual diotria!"

A forsa da starnasar al Signur al la ved e 'gh fa: "Sta calmo nono! La to fede la t'ha salva! Ades at po lesar anca la posologia dal Tavor, quela scrita in piculin! Adzita tan tosi an po' e tat meti chiet!"

L'è parola dal signur